BHÍ an fócas ar pháistí Dé Sathairn nuair a sheol Éabhlóid an leabhar úr Mamaí Gé in Amharclann Ghaoth Dobhair le daoine óga ón cheantar ag aithris na rannta is fearr leo ón leabhar úr.
Is bailiúchán dátheangach de rannta “Mamaí Gé” (Mother Goose Rhymes) atá sa leabhar a d’aistrigh an file bisiúil Gabriel Rosenstock agus atá lán de léaráidí gleoite a rinne an t-ealaíontóir gradamach Kim Sharkey.
Tá 79 rann sa leabhar ina iomláine, i nGaeilge agus i mBéarla, agus gach ceann acu curtha i láthair le léaráidí tarraingteacha spraíúla a rinne Kim. Cé nach raibh Gabriel Rosenstock ábalta a bheith i láthair, chuir sé nóta speisialta chuig na páistí a léadh amach ag an ócáid. Arsa Gabriel sa nóta:
“Tá sibhse, aos óg na hÉireann, chomh tábhachtach le léitheoirí atá níos sine ná sibh; i mo shúilese, ar aon nós, is tábhachtaí sibh ná daoine fásta! Is oscailte sibh i ngach slí ná daoine fásta agus níl sibh tosaithe fós ar an sclábhaíocht laethúil sin is gá a dhéanamh chun arán a chur ar an mbord; mar sin tá sibh in ann bhur samhlaíocht a úsáid níos minice ná daoine fásta a bhíonn ag féachaint ar an gclog an t-am ar fad!”
Tara Gallagher ag amharc ar bhunobair Kim Sharkey.
Labhair Kim Sharkey ansin ar an modh oibre a bhí aici ag déanamh na léaráidí:
“Turas fada a bhí ann, thar trí bliana oibre,” arsa Kim. “Cuireadh cuid mhór taighde isteach sna léaráidí. Bhí deis agam labhairt le lear mór daoine sa phobal faoin ionadaíocht a dhéantar orthu agus tá cuid acu anseo inniu.
Bhí sé iontach an tseans a fháil na rannta seo a chur i dtimpeallacht chomhaimseartha, ón éadach a chaitheann na carachtair go dtí léir rudaí beaga eile – mar a oibríonn teaghlaigh an lae inniu mar shampla – agus tá súil agam go mbeidh daoine óga ábalta ceangail a bheith acu leis na pictiúirí atá sa leabhar,” a dúirt sí.
Dúirt sí gur thiomnaigh sí an leabhar dá garneachtanna agus a garnianna, cuid acu a bhí i láthair, agus gur “iadsan bun agus barr an scéil – an chéad ghlúin eile.”
Ansin, tháinig páistí as an phobal chun tosaigh, agus, faoi stiúir Suzanne Ní Ghallchóir chuir siad brí agus anam sa leabhar trína gcuid aithriseoireachta ar rannta agus trína gcuid tuairimí faoi leabhar a roinnt leis an lucht éisteachta mór a bhí i láthair. Ba iad Aoibh Nic Pháidín, Aela Nic Suibhne, Sophie agus Freya Feiritéar, Annie agus Rosie Ní Churráin, Rian Beauron agus Muireann Ní Dhomhnaill a tháinig aníos duine ar dhuine agus a chur a gcuid rannta i láthair go bríomhar agus a mhínigh cad chuige ar phioc siad an rann a phioc siad le haithris ón leabhar.
Leonie Nic Aoidh Feiritéar agus Colm Feiritéar.
Phioc Sophie an rann Sa Tóir ar Bhéar mar go raibh sé chomh greannmhar sin. Léigh Aela an rann Dá mbeadh gach Muir mar aon Mhuir Amháin mar gur chuir sé a hathair mór a bhfuil bád aige i gcuimhne di, agus roghnaigh Muireann Tomaí Beag an Úcaire siocair go bhfuil dúil mhór aicise sa drámaíocht agus tá Tomaí Beag é féin le feiceáil ar an stáitse sa léaráid a théann leis an rann.
Lean an ceiliúradh ar aghaidh le babhta ceoil ó na daoine óga, rud a chuir go mór leis an chomhluadar dheas a bhí i láthair san Amharclann, áit a raibh rogha iontach bia curtha ar fáil ag foireann an chaifé agus ceol beo curtha ar fáil ag Áine Ní Fhearraigh agus Pádraig Mac Suibhne ón ghrúpa áitiúil ón Chrannóg.
Tá an leabhar Mamaí Gé ar fáil ó eabhloid.com agus ó shiopaí leabhar ar fud na tíre.
Related posts:
Receive quality journalism wherever you are, on any device. Keep up to date from the comfort of your own home with a digital subscription.
Any time | Any place | Anywhere
SUBSCRIBE TO CURRENT EDITION TODAY
and get access to our archive editions dating back to 2007(CLICK ON THE TITLE BELOW TO SUBSCRIBE)